Go to ...
RSS Feed

Sérkennileg framtíðarsýn


Davíð Þorláksson, fyrrverandi formaður Sambands ungra sjálfstæðismanna, spyr:

„Hvers vegna búum við ekki frekar til þannig aðstæður að húsnæðiskostnaður verði sem lægstur í stað þess að hækka hann á einum enda opinbers rekstrar og greiða hann niður á öðrum?”

Er nema von að spurt. Í pistli sem Davíð skrifar í Viðskiptablaðið segir hann það sérkennilega framtíðarsýn að búa til viðameira bótakerfi og öflugri húsnæðissamvinnufélög í landi þar sem langflestir vilja búa í eigin húsi. Hér  vísar Davíð í frumvörp félags- og húsnæðismálaráðherra „sem ætlað er að lækka húsnæðiskostnað þeirra efnaminni með húsnæðisbótum, með tilheyrandi kostnaði fyrir skattgreiðendur, og auka réttindi leigjenda og búseturéttarhafa í húsnæðissamvinnufélögum”:

„Það er kannski liður í afmælisfögnuði, nú þegar 100 ár eru liðin frá stofnun Framsóknarflokksins, að dusta rykið af jafngömlum hugmyndum og leita lausna í bótum og samvinnufélögum. Menn virðist þó ekki átta sig á hinu augljósa; að aukin réttindi leigutaka gagnvart leigusölum og hærri bætur munu að sjálfsögðu skila sér í hærra leiguverði.

Stjórnvöldum virðist ekki hafa hugkvæmst, sem er þó eðlilegri lausn, að aflétta kvöðum, gjöldum og sköttum af húsbyggjendum og fasteignaeigendum til að lækka byggingarkostnað, kostnað við fasteignakaup og rekstrarkostnað fasteigna, sem myndi skila sér í lægra leiguverði.”

Davíð bendir einnig á að ríkið geti einnig stuðlað að lægri byggingarkostnaði með því að aflétta óþarflega kvöðum í byggingareglugerðum, sveitarfélög geti einnig lagt sín lóð á vogarskálarnar m.a. með því að lækka kostnað með því að minnka kvaðir og gjaldtöku af byggingaframkvæmdum.