Go to ...
RSS Feed

Guðmundi Steingrímssyni vísað úr salnum


Björn Bjarnason, fyrrverandi ráðherra, segir að Guðmundi Steingrímssyni, þingmanni Bjartrar framtíðar, hefði verið vísað úr þingsal ef sami agi væri á þingstörfum hér á landi og í Bretlandi. Guðmundur sakaði fyrrverandi forsætisráðherra um að vera „frægasta fjárglæframann heimsbyggðarinnar“.

Í dagbókarfræslu segir Björn að stjórnarandstæðingar á þingi og í fjölmiðlum grípi „oft til þeirra raka þegar allt um þrýtur að eitthvað yrði ekki liðið erlendis“. Hann bendir á að heitar umræður hafi átt sér stað í neðri deild breska þingsins síðastliðinn mánudag vegna Panama-skjalanna og stöðu Davids Camerons forsætisráðherra:

„Meðal þingmanna Verkamannaflokksins sem tóku til máls var Dennis Skinner, 84 ára sem setið hefur 46 ár á þingi. Hann var harðorður í garð Camerons og sagði hann dodgy sem íslenskað er með orðunum brögðóttur; slóttugur í orðabókinni. Forseta þingsins þótti þetta ekki við hæfi og bað þingmanninn að draga orðið til baka sem hann gerði ekki heldur endurtók og sagði dodgy Dave sem íslenska má sem Dabbi bragðarefur. Við svo búið vísaði forseti þingmanninum úr salnum það sem eftir var þessa fundar.

James Kirkup, dálkahöfundur The Daily Telegraph, segir að viðbrögð forseta þingsins hafi verið rétt vegna þess að þingsköp banni þingmönnum að draga í efa markmið og heiður honour annarra þingmanna, þeir séu allir taldir honourable, háttvirtir, heiðarlegir. „Margt í þingsköpunum er dálítið galið og úrelt, þessi regla er þó ekki unnt að flokka sem gamaldags helgisiði. Í henni felst fullkomlega eðlileg aðferð til að stjórna umræðum.““

Björn rifjar síðan upp reglur Alþingis um hvernig þingmenn skuli ávarpa hverja aðra og ganga fram í umræðum almennt. Hann vitnar síðan í 93. grein þingskapalaga þar sem segir:

„Ef þingmaður talar óvirðulega um forseta Íslands eða ber þingið eða ráðherra eða einhvern þingmann brigslyrðum eða víkur með öllu frá umtalsefninu skal forseti kalla til hans: „Þetta er vítavert“, og nefna þau ummæli sem hann vítir. Nú er þingmaður víttur tvisvar á sama fundi og má þá forseti, með samþykki fundarins, svipta þingmanninn málfrelsi á þeim fundi.“

Undir lok dagbókarfærslunnar skrifar Björn:

„Guðmundur Steingrímsson, þingmaður Bjartrar framtíðar, sagði Sigmund Davíð Gunnlaugsson, fráfarandi forsætisráðherra, „frægasta fjárglæframann heimsbyggðarinnar“ í þingræðu 4. apríl. Í þingtíðindum stendur: „(Forseti (EKG): Forseti biður hv. þingmann að gæta orða sinna.)“ Dæmið frá London sýnir hvernig tekið hefði verið á Guðmundi í þinginu þar.“